ရွှေ့ပြောင်းသွားလာခြင်းနှင့် ကလေးဖြည့်စွက်စာ

ခိုင်ရီ ရေးသည်

(ဆောင်းပါးရေးသူသည် ဝါရင့်သတင်းသမားတစ်ဦးဖြစ်သလို မိခင်တစ်ဦး လည်းဖြစ်သည်။ ယခုဆောင်းပါးရေးသားခြင်းအတွက် ဒို့အိမ်မက် မှ ပံ့ပိုးကူညီပေးထားသည်။)

မမေမိုး ဟာ အသက် ၇လ ဝန်းကျင်အရွယ် ကလေးငယ်ရဲ့ မိခင်တစ်ဦးဖြစ်ပါတယ်။

ကလေး ၆လသားအထိ မိခင်နို့တမျိုးတည်းကိုပဲ သေသေချာချာ တိုက်ကျွေးခဲ့သလို၊ အသက် ၆လပြည့်ချိန်မှာ ဖြည့်စွက်စာ စတင်ကျွေးခဲ့ပါတယ်။

ကလေးကို ဖြည့်စွက်စာကျွေးတဲ့အခါမှာ အသင့်ပြုပြင်ဖန်တီးထားတဲ့ အရာတွေကိုမကျွေးဘဲ၊ ကိုယ်တိုင်ဖန်တီးပြီးကျွေးဖို့ ကြိုးစားတယ်။ မမေမိုးရဲ့ တစ်နေ့တာဟာ အသက်မွေးဝမ်းကျောင်းအလုပ်အပြင် ကလေးအတွက် ဖြည့်စွက်စာနဲ့ ကလေးပြုစုပျိုးထောင်ရေးစာတွေရှာဖွေဖတ်ရှုရတာစသဖြင့် တွေနဲ့ လက်မလည်ပါဘူး။

မွေးကင်းစကလေး ပြုစုရေးနဲ့ ကလေးအတွက် အာဟာရဆိုင်ရာ ဗဟုသုတလည်းရှိ၊ အချိန်မှန်မှန်နဲ့ ဂရုတစိုက် ဖြည့်စွက်စာကျွေးဖို့ စိတ်အားထက်သန်တဲ့ မမေမိုးတစ်ယောက် ကလေးနဲ့အတူ ခရီးထွက်ဖို့ အကြောင်းဖန်လာ ပါတယ်။

ရန်ကုန်ကိုရောက်ဖို့အတွက် ၁၅နာရီလောက် ကားစီးရမယ့်အကွာအဝေးအတွင်းမှာ ကလေးကို နို့တိုက်တာ၊ ရေတိုက်တာ၊ ဖြည့်စွက်စာကျွေးတာတွေကို ကားပေါ်မှာ စနစ်တကျလုပ်နိုင်အောင် အလွယ်တကူ ပြင်ဆင်ခဲ့ ပါတယ်။

အိမ်ကနေစထွက်တော့ ကလေးအတွက် ပေါင်းပြီး ကြိတ်ထားတဲ့အသီးအနှစ်လေးရယ်၊ ငှက်ပျောသီးမှည့်ရယ်၊ မုန်လာဥနီနဲ့ အာလူးလေးထည့်ပြုတ်ပြီး ဇကာတိုက်ထားတဲ့ ထမင်းအနှစ်ရယ် ထည့်ယူလိုက်တယ်။ သယ်ရမယ့် ပစ္စည်းတွေထဲမှာ ကလေးအဝတ်အစား၊ ဒိုင်ဘာ၊ ဆေးဝါးနဲ့ ကလေးရဲ့စားစရာတွေက အများဆုံး နေရာယူထား တယ်။

အိမ်မှာတုန်းကတော့ ကလေးအတွက် ဖြည့်စွက်စာကျွေးဖို့ အချိန်ဇယားနဲ့ မှတ်ပြီး၊ တစ်နေ့တာအတွက် ကျွေးမယ့်အမယ်၊ အချိန်၊ ပမာဏ စသဖြင့် သေသေချာချာ ဂရုစိုက်ပေးနိုင်ခဲ့ပါတယ်။ ကောက်ခါငင်ခါခရီးထွက်လာရချိန်မှာတော့ သူရည်မှန်းထားတဲ့ စံချိန်စံညွှန်းတွေကို လျှော့ချပြီး၊ အချိန်ရော၊ ကရိကထရော ကျုံ့သွားစေမယ့်နည်းကို စဉ်းစားရပါတော့တယ်။

အိမ်ပြန်ဖို့အတွက် ရက်ကြာဦးမယ်ဆိုတော့ တချို့ ဖြည့်စွက်စာပြင်ဆင်ဖို့ အချိန်မရတဲ့ အခါ အစားထိုးကျွေးဖို့ အတွက် တစ်ခုခုတော့ စီစဉ်ဖို့လိုတယ်ဆိုတာ မမေမိုးတွေးမိတယ်။

ရန်ကုန်ရောက်တာနဲ့ ဈေးဝယ်စင်တာတစ်ခုကို အပြေးသွားပြီး နယ်မှာ ဝယ်လို့မရတဲ့၊ မိဘတွေချည်း သီးသန့်ရှိတဲ့ လူမှုကွန်ရက်အဖွဲ့လေးတွေမှာ အရည်အသွေးကောင်းတယ်လို့ မှတ်ချက်ပြုကြတဲ့ ဖြည့်စွက်စာ အာဟာရမှုန့် သံဘူးလေး တစ်ဘူးဝယ်လိုက်ပါတယ်။

အဲဒီ ဖြည့်စွက်စာဘူးလေးက ဘယ်လ်ဂျီယံနိုင်ငံက တင်သွင်းလာတာလို့ ဖော်ပြထားတယ်။ ကောက်နှံတစ်မျိုး၊ ပြောင်းဖူး၊ ပန်းသီး၊ နာနတ်သီးစတဲ့ အမယ်တွေနဲ့ အချိုးကျဖန်တီးထားတဲ့ ကလေးဖြည့်စွက်အာဟာရမှုန့် ဘူးလေးကို ကိုင်ပြီး အိမ်ပြန်လာခဲ့တယ်။

အပြင်က အစားအစာကို ပထမဆုံးကျွေးဖူးတဲ့ မိခင်တစ်ယောက်ဖြစ်တဲ့အတွက် အချိုးအစားကို ဘယ်လိုဖျော်စပ်ရမယ်ဆိုတာ မသိရုံမက၊ ရေနွေးပူပူနဲ့ဖျော်ရမလား၊ ရေအေးနဲ့လားဆိုတာလည်း မသိပါဘူး။ ဘူးမှာဖော်ပြထားတဲ့စာတွေကို အမှားအယွင်းမရှိအောင် အထပ်ထပ်ဖတ်ပြီး၊ ကလေးမွေးဖူးတဲ့ စီနီယာ ယောက်မဖြစ်သူကို မေးကြည့်တယ်။

သူကလည်း မကျွေးဖူးဘူး။ ဒါပေမယ့် ရေနွေးနွေးလေးနဲ့ အပျစ်အကျဲ ညီညီလေးဖျော်ပြီး ကျွေးလို့ရတယ်လို့ အကြံပေးပါတယ်။ မမေမိုးတစ်ယောက် ၇လသားလေးကို ရယ်ဒီမိတ် ဖြည့်စွက်စာ စကျွေးပါပြီ။

ဘာကျွေးကျွေး အင်မတန်အစားမက်တဲ့ ကလေးကြောင့် စိတ်ချမ်းသာရတယ်။ ဖျော်ထားတဲ့ ပန်းကန်ထက်ဝက် ကုန်သွားတော့ ဆက်မစားတော့ဘူး။ ပါးစပ်တွေကို ကလေးတွေအတွက်ထုတ်ထားတဲ့ တစ်သျူးအစိုလေးနဲ့ သုတ်ပေးပြီး ပန်းကန်ခွက်ယောက်တွေ ဆေးနေလိုက်တယ်။ မီးဖိုခန်းထဲက ပြန်အထွက် ကလေးရဲ့မျက်နှာကို ကြည့်လိုက်တဲ့အချိန်မှာ မမေမိုးတယောက် လန့်ဖျတ်သွားပါတော့တယ်။

ကလေးရဲ့ ပါးစပ်ဘေးတဝိုက်၊ မေးစေ့နဲ့ နဖူးတွေမှာ အနီရောင် အကွက်တွေ ထနေတာကို မြင်လိုက်ရတယ်။ ချက်ချင်းပဲ တရားခံကို ရှာရပါတယ်။ အသစ်ဝယ်လာတဲ့ တစ်သျှူးအစိုကြောင့်ဖြစ်တာလား၊ ဖြည့်စွက်စာကြောင့်ဖြစ်တာလား၊ အစာအဆိပ်သင့်တယ်ဆိုတာလား စတဲ့ မေးခွန်းတွေကို အဖြေရှာမိပါတယ်။

ကလေးမျက်နှာက အနီပြင်တွေဟာ ပိုပြီး တိုးပွားလာပါတယ်။ တစ်ခါမှ ဒီလိုမကြုံဖူးတဲ့အတွက် ထိတ်ထိတ်ပြာပြာ ဖြစ်နေတဲ့ မမေမိုးတို့ ဇနီးမောင်နှံဟာ ကလေးကိုချီပြီး ရန်ကုန်ကလေးဆေးရုံကြီး(ဟယ်လ်ပင်) ပြင်ပလူနာဌာနကို သုတ်ခြေတင်ရပါတော့တယ်။ မမေမိုးတို့ ဇနီးမောင်နှံဟာ  သူ့အဖေက ကလေးကိုချီ၊ မမေမိုးက ကလေးကို ကျွေးထားတဲ့ ဖြည့်စွက်စာဘူးကို ကိုင်ပြီး ကလေးမျက်နှာကို မှန်ကြည့်သလို ကြည့်နေကြရတယ်။ ကလေးကိုကြည့်ရတာ တစ်ခုခုနာကျင်နေတာ၊ ယားယံနေတာမျိုး၊ မခံမရပ်နိုင်ဖြစ်နေတာမျိုးတော့ မတွေ့ရပါဘူး။

ရန်ကုန်ရဲ့ ထုံးစံအတိုင်း မီးပွိုင့်မိတာ၊ ကားကြပ်တာတွေကို ကျော်လွန်ပြီး ပြင်ပလူနာဌာနက ကလေးဆရာဝန်နဲ့ တွေ့ဖို့အတွက်စောင့်ဆိုင်းချိန်မှာတော့ ရင်ခွင်ထဲက ၆လသားလေးရဲမျက်နှာဟာ အနီကွက်တွေပါးပြီး ပျောက်လုနီးပါး ဖြစ်လာပါတယ်။

အိမ်ကနေစထွက်ကတည်းက ဆရာဝန်နဲ့ တွေ့တဲ့အချိန်အထိ ကြားမိနစ်၄၀လောက်ကြာမြင့်ချိန်မှာ မျက်နှာကအနီကွက်တွေက ပျောက်လာသလို၊ စောစောက ဖြစ်ခဲ့တာ သူမဟုတ်သလိုနဲ့ အခြေအနေမျိုးကို ရောက်လာပါတယ်။

တာဝန်ကျ ကလေးဆရာဝန်နဲ့တွေ့ရချိန်မှာ ဘာအနီကွက်မှမရှိတော့တဲ့အတွက် အကျိုးအကြောင်းကို ရှင်းပြရ ပါတယ်။ ဆရာဝန်က ကလေးဖြည့်စွက်စာ အာဟာရမှုန့်နဲ့ ဓာတ်မတည့်တာဖြစ်နိုင်ကြောင်း ရှင်းပြသလို၊ သေချာအောင် သွေးလွန်တုတ်ကွေးစစ်ပေးပါတယ်။  လိုအပ်တဲ့ စမ်းသပ်စစ်ဆေးမှုတွေကို လုပ်ပြီးတဲ့အခါ စိုးရိမ်စရာမရှိတော့တဲ့အတွက် စိတ်လက်ပေါ့ပါးစွာနဲ့ အိမ်ပြန်ခဲ့ကြပါတယ်။

အစာနဲ့ ကလေးဓာတ်မတည့်ခြင်းနဲ့ ပတ်သက်တဲ့ အကြောင်းအရာကို မမေမိုးတစ်ယောက် ရှာဖွေဖတ်ရှုကြည့်တဲ့ အခါမှာ အသိတစ်ခု ထပ်ရရှိခဲ့ပါတယ်။ ကလေးကို ဖြည့်စွက်စာကျွေးစအချိန်မှာ အသစ်အဆန်း တစ်မျိုးကို ၃ရက်ပြည့်အောင်ကျွေးဖို့ အာဟာရပညာရှင်တွေက အကြံပြုပါတယ်။

အစာအသစ်အဆန်းတမျိုးကို ကျွေးမယ်ဆိုရင် တစ်မျိုးကို ၃ရက်ပြည့်ပြီးမှ နောက်အသစ်တမျိုးကို ထပ်တိုး ထည့်သင့်ကြောင်းနဲ့ ဓာတ်မတည့်တာဖြစ်ရင် အခုလို အနီကွက်တွေ ထွက်တတ်တာ၊ ပိုဆိုးတယ်ဆိုရင် အန်တာ၊ ဝမ်းသွားတာတွေဖြစ်တတ်ကြောင်း အသိပညာအသစ် မှတ်သားရပါတယ်။ ဒီလို ဓာတ်မတည့်မှုတွေဖြစ်ပြီဆိုရင် အဲဒီအမယ်အသစ်ကို ရက်အတော်ကြာကြာ ရပ်ထားပြီး ကာလအတန်ကြာမှ ထပ်ကျွေးကြည့်လို့ရတယ်လို့ အာဟာရဆိုင်ရာ ပညာရှင်တွေက ဆိုပါတယ်။

ခရီးသွားနေရချိန်ဖြစ်လို့ ကလေးဖြည့်စွက်စာပြင်ဆင်ဖို့အတွက် အချိန်ရော၊ ကရိကထရော ကျုံ့သွားစေမယ့် နည်းကို ရွေးချယ်လိုက်တဲ့ မမေမိုးဟာ ဖြည့်စွက်စာဘူးကို ပြန်ပြီး လေ့လာလိုက်တဲ့အခါမှာ သူ့မှာပါတဲ့ အထဲက နာနတ်သီးနဲ နဲ့ ပြောင်းဖူးဟာ တစ်ခါမှ စမ်းမကျွေးဖူးသေးတဲ့ အမယ်သစ်တွေဖြစ်တာကို တွေ့ရပါတယ်။

သူ့အဖေက ချောမြူလိုက်တဲ့အခါ လန်းလန်းဆန်းဆန်း၊ အေးအေးလူလူ ပုံစံလေးနဲ့ ခိုးခိုးခစ်ခစ်ရယ်နေတဲ့ ၇လသားကလေးကို မြင်ရတော့မှ မမေမိုးတယောက် သက်ပြင်းချနိုင်ပါတော့တယ်။