ရန်ကုန်တိုင်းထဲက မြို့နယ်အချို့မှာ ဝမ်းပျက်ဝမ်းလျှော ရောဂါဖြစ်ပွားနေ
ဇူလိုင် ၂၄၊ ရန်ကုန်
ဇူလိုင်လရဲ့ ရက်ပေါင်း ၂၀ ကျော်အတွင်းမှာ ရောဂါဖြစ်ပွားသူ ၁၂၀၀ ဝန်းကျင် ရှိ
အဆိုပါ ရောဂါဖြစ်ပွားသူထဲမှာ ပြင်းထန်းဝမ်းဝမ်းလျှောရောဂါဖြစ်သူ ၁၁၀ ကျော်ရှိပြီး ကျန်တဲ့ လူနာ ၁၀၀၀ ကျော်ကတော့ သာမန်ဝမ်းပျက်ဝမ်းလျှောရောဂါဖြစ်ပွားသူတွေဖြစ်ကြောင်း နဲ့ရောဂါဖြစ်ပွားမှုစာရင်းဟာ ဇူလိုင်လ ၃ရက်ကနေ ဇူလိုင်လ ၂၂ ရက်နေ့အထိစာရင်းဖြစ် ပါတယ်။
ဝမ်းပျက်ဝမ်းလျှော ရောဂါဟာ ရန်ကုန်တိုင်းထဲက သာကေတမြို့နယ်၊ဒေါပုံမြို့နယ်တွေမှာစတင်ဖြစ်ပွားခဲ့ပြီးနောက် အခြားမြို့နယ်တွေဖြစ်တဲ့ ရွှေပြည်သာ၊လိူင်သာယာ၊မြောက်ဒဂုံ၊ဒဂုံဆိပ်ကမ်း ၊တောင်ဒဂုံ၊မင်္ဂလာတောင်ညွန့်၊ပုဇွန်တောင်ဗိုလ်တထောင်မြို့နယ်တွေအပါအဝင်စတဲ့မြို့နယ်တွေမှာပါ ရောဂါကူးစက်ဖြစ်ပွားနေတာဖြစ်ပါတယ်။
ဒါကြောင့်လူမှုကူညီရေးအဖွဲ့တွေ၊မြို့နယ်ကျန်းမာရေးအဖွဲ့တွေကရပ်ကွက်အလိုက်နေအိမ်တွေကိုသောက်ရေထဲကလိုရင်းဆေးမှုန့်ခတ်ခြင်း၊ရောဂါဖြစ်ပွားရာနေအိမ်တွေကိုပိုးသတ်ဆေးဖြန်းခြင်းအပြင်ရပ်ကွက်အချို့မှာယာယီဆေးခန်းဖွင့်ပြီးကုသမှုတွေပေးနေတယ်လို့သိရပါတယ်။
လက်ရှိမှာ ယာယီဆေးခန်းတွေကိုတော့ ဝမ်းပျက်ဝမ်းလျှော ရောဂါဖြစ်ပွားများခဲ့တဲ့ ေဒါပုံမြို့နယ်ထဲက နွယ်အေးရပ်ကွက်၊ ပုသိမ်မြေနဲ့ ကျောက်ကွင်းရပ်ကွက်တွေ ဖွင့်ထားသလို သာကေတမြို့နယ်ထဲက ထူပါရုံရပ်ကွက်မှာ ယာယီဆေးခန်းဖွင့်ပြီး ဝမ်းပျက်ဝမ်းလျှော ဖြစ်ပွားသူတွေကိုစစ်ဆေးကုသပေးနေတာဖြစ်ပါတယ်။
ဝမ်းပျက်ဝမ်းလျှော ရောဂါကြောင့် သေဆုံးသူမရှိသေးဘူးလို့ ကျန်းမာရေးဝန်ကြီးဌာနဘက်ကပြောဆိုထားပေမယ့် မြေပြင်မှာ ကွင်းဆင်းပြီးလုပ်ကိုင်နေတဲ့အဖွဲ့အစည်းတွေကတော့ ဝမ်းပျက်ဝမ်းလျှောရောဂါကြောင့်သေဆုံးသူ ၆ ဦးလောက်ရှိထားတယ်လို့ဆိုပါတယ်။
” ခုရက်လူနာတွေ တွေ့ရှိမှုလျော့ကျလာပြီး အခြေအနေကထိန်းနိုင်လာတဲ့ပုံစံရှိပေမယ့် နေ့တိုင်းတော့ ဝမ်းပျက်ဝမ်းလျှောရောဂါဖြစ်သူကရှိနေတုန်းပဲ။အရင်လောက်တော့မများတော့ဘူး။
သာကေတမှာတင် သေတာ ၅ယောက်ရှိတယ်။ဒါပေမယ့်သူတို့ကတော့ ဝမ်းပျက်ဝမ်းလျှောကြောင့်မဟုတ်ဘူးရောဂါအခံကြောင့်သေတယ်ပြောကြတယ်။” လို့ ဝမ်းပျက်ဝမ်းလျှော ရောဂါဖြစ်ပွားနေမှုနဲ့ပတ်သက်လို့ မြေပြင်မှာအမှန်တကယ်ကွင်းဆင်းဆောင်ရွက်နေတဲ့ပြည်သူတစ်ဦးကပြောပါတယ်။
ရန်ကုန်မှာတော့ဝမ်းပျက်ဝမ်းလျှောရောဂါဖြစ်ပွားမှုကအရင်နှစ်ကထက်ပိုပြီးမြန်ဆန်ပြီးဖြစ်ပွားမှုနူန်းလည်းပိုမြင့်လာတဲ့အခြေအနေရှိတယ်လို့သိရပါတယ်။
အဓိကဝမ်းပျက်ဝမ်းလျှောရောဂါဖြစ်ပွားရခြင်းကသောက်ရေမသန့်ခြင်းနဲ့ယင်နားစာတွေစားသုံးမိခြင်းကြောင့်ဖြစ်ပွားရတာဖြစ်လို့ဝမ်းပျက်ဝမ်းလျှောရောဂါလက္ခဏာတွေခံစားရပါကမိမိရပ်ကွက်၊မြို့နယ်အလိုက်မှာရှိတဲ့ကျန်းမာရေးဆေးခန်းကိုသွားရောက်ပြသနိုင်သလို လူမှုကူညီရေးအသင်းတွေကို ဆက်သွယ်ကာအကူအညီတောင်းခံနိုင်ကြောင်းနဲ့ နီးစပ်ရာမိမိမြို့နယ်ကဆေးရုံကိုလည်းသွားရောက်ပြသနိုင်သလိုရပ်ကွက်အုပ်ချုပ်ရေးအဖွဲ့ကိုဆက်သွယ်ပြီးလည်းအကူအညီတောင်းခံနိုင်မှာဖြစ် ပါတယ်ဆိုပါတယ်။
သတင်းရေးသားပေးပို့သူ = ချစ်ခွန်းချို
တည်းဖြတ်- MyanHealth’s Editorial team
သတင်းရေးသားသူသည် ၂၀၁၂ မှ စတင်ပြီး သတင်းလုပ်ငန်းများကို လုပ်ကိုင်နေသည့် ဂျာနယ်လစ်တစ်ဦးဖြစ်သည်။တိုင်းရင်းသားရေးရာများ၊စိုက်ပျိုးစီးပွားသတင်းများ၊လူမှုဘဝ နှင့် ယဥ်ကျေးမှု ဆိုင်ရာ ဆောင်းပါးများကိုအဓိကထားရေးသားလျက်ရှိသည်။
