ရန်ကုန်တိုင်းမှာ ကလေးများ ဝမ်းပျက်ဝမ်းလျှော ရောဂါအဖြစ်များနေ၊ ကလေးငယ်တစ်ဦးသေဆုံး
ဩဂုတ် ၂၅
ရန်ကုန်တိုင်းမှာ ကလေးငယ်တွေ ဝမ်းပျက်ဝမ်းလျှော ရောဂါဖြစ်ပွားမှု များလာနေပြီး ခုရက်ပိုင်းမှာပင် ကလေးငယ်တစ်ဦး သေဆုံးတဲ့အထိ ရှိလာနေတယ်လို့ သိရပါတယ်။
ကလေးငယ်တွေအနေနဲ့ ဝမ်းပျက်ဝမ်းလျှောမှုရောဂါဝေဒနာဒဏ်ကို ခုခံကာကွယ်နိုင်မှုအားနည်းတဲ့အတွက်ကြောင့် ဝမ်းပျက်ဝမ်းလျှောရောဂါလက္ခဏာကို ခံစားရပြီး နာရီပိုင်းအတွင်းမှာ ရန်ကုန်တိုင်းတွင်းက အသက် ၂ နှစ် နဲ့ ၁၁ လ အရွယ်ကလေးငယ်တစ်ဦး ဩဂုတ်လ ၂၃ ရက်နေ့ ၊ ရန်ကင်းကလေးဆေးရုံမှာ သေဆုံးခဲ့တာဖြစ်တယ်လို့သိရပါတယ်။
” တစ်ညလုံး ဝမ်းပျက်ဝမ်းလျှော အန်ပြီး မနက်ဆေးရုံရောက်တော့ဆုံးတာပဲ ။သားလေးက ဝမ်းလျှောတာများပီး ရေဓါတ်ခမ်းသွားလို့ အသက်ဆုံးရှုံးလိုက်ရတာ။ ဘယ်လိုမှ ဖြေမဆည်နိုင်ဘူး။” လို့ ကလေးငယ်ရဲ့ မိခင်ဖြစ်သူကပြောပါတယ်။
လက်ရှိအထိလည်း ဆေးရုံတွေမှာ ဝမ်းပျက်ဝမ်းလျှော ရောဂါဖြစ်လို့ ဆေးကုသမှုခံယူနေရသူတွေရှိနေဆဲဖြစ်တယ်လို့ သိရပါတယ်။
” ဒဂုံဆိပ်ကမ်းဘက်မှာလည်း ဝမ်းလျှောလို့လာပြတဲ့ကလေးတွေတော်တော်များတယ်။ကျန်တဲ့ မြို့နယ်တွေမှာလည်းဝမ်းလျှောလို့ပြတာများလာတယ်။ဝမ်းအကြိမ်ရေများများသွားတယ်၊အန်တယ်၊အစားမဝင်ဘူးဆိုရင်မပေါ့ပါနဲ့နီးစပ်ရာဆေးခန်း၊ဆေးရုံကိုချက်ခြင်းသွားပါ၊ကုသမှုခံယူပါ။ကလေးတွေက ခုခံနိုင်မှုနည်းပါတယ်။” လို့ အထွေထွေရောဂါကုဆရာဝန်တစ်ဦးကပြောပါတယ်။
ရန်ကုန်တိုင်းထဲက မြို့နယ်အများစုမှာ ရေကြီးရေလျှံမှုဖြစ်ပွားပြီးနောက် လူကြီးတွေအပြင် ကလေးငယ်တွေပါ ဝမ်းပျက်ဝမ်းလျှောရောဂါဖြစ်ပွားမှုက တဖန်ပြန်လည် မြင့်တက်ကာ များပြားလာတာဖြစ်ပါတယ်
” ရန်ကင်းက ကလေးဆေးရုံမှာ သားလိုပဲအပူကြီးပြီး သတိလစ်၊ တက်၊ ဝမ်းလျှော ဝမ်းကိုက်တဲ့ ကလေးတွေ နေ့တိုင်း ဆေးရုံလာတက်ကြတာတွေ့ရပါတယ်။သားသတိလစ် တက်၊ နေတုန်း နှာခေါင်းပိုက်ထည့်တယ်လက်မှာ အပ်ထိုးပြီး ဆေးသွင်းရတယ်။ သားက ဆေးရုံမှာငါးရက်နေခဲ့ရပါတယ်။” လို့ ဝမ်းလျှောလို့ဆေးရုံတက်ခဲ့ရတဲ့ ကလေး ၃ နှစ်ဝန်းကျင်ရဲ့မိခင်တစ်ဦးကပြောပါတယ်။
ရန်ကုန်တိုင်းထဲမှာ ဝမ်းပျက်ဝမ်းလျှော ရောဂါဖြစ်ပွားမှုက ဇူလိုင်လကတည်းကစတင်ဖြစ်ပွားခဲ့တာဖြစ်ပြီး လက်ရှိအထိလည်း ဝမ်းပျက်ဝမ်းလျှော ရောဂါဖြစ်ပွားသူများပြားနေပါတယ်
ရန်ကုန်တိုင်းထဲကမြို့နယ်တွေမှာ ဝမ်းပျက်ဝမ်းလျှောရောဂါဖြစ်ပွားမှုအနေနဲ့ဆိုရင် ဇူလိုင်လထဲမှာပင် ကလေး၊လူကြီးအပါအဝင် လူ ၁၄၀၀ ထက်ဝမ်းပျက်ဝမ်းလျှောရောဂါခံစားခဲ့ရပြီး အဲဒီထဲမှာမှ ပြင်းထန်းဝမ်းဝမ်းလျှောရောဂါဖြစ်ပွားသူက ၁၀၀ ကျော်လောက်ရှိခဲ့ကြောင်းသိရပြီး ဩဂုတ်လအတွင်းရောဂါဖြစ်ပွားမှုအခြေအနေကိုတော့ ကျန်းမာရေးဦးစီးဌာနက ထုတ်ပြန်ခြင်းမရှိသေးတဲ့အတွက် မသိရှိရသေးပါဘူး။
” ဝမ်းပျက်ဝမ်းလျှောဖြစ်တာတွေဆေးရုံမှာပုံနေတယ်။အများကြီးပဲ။လူနာလမ်းကြောင်းလိုက်ပို့ရတော့မြင်တွေ့နေရတာ။မပေါ့ဆသင့်ဘူး။ဂရုစိုက်ဖို့လိုအပ်နေတယ်။သူကဖြစ်ရင် ပုဂ္ဂလိကမှာလည်းကုမရဘူး။ အစိုးရဆေးရုံပဲသွားရတာ “ လို့ ရန်ကုန် တိုင်း ကြည်မြင်တိုင်က လူမှုကူညီရေးသမားတစ်ဦးကပြောပါတယ်။
ဝမ်းပျက်ဝမ်းလျှောရောဂါဟာ ရန်ကုန်တိုင်းထဲကသာကေတမြို့နယ်၊ဒေါပုံမြို့နယ်တွေမှာစတင်ဖြစ်ပွားခဲ့တာဖြစ်ပြီး အဲဒီနောက်မှာ ရွှေပြည်သာ၊လိူင်သာယာ၊မြောက်ဒဂုံ၊ဒဂုံဆိပ်ကမ်း ၊တောင်ဒဂုံ၊မင်္ဂလာတောင်ညွန့်၊ပုဇွန်တောင်ဗိုလ်တထောင်မြို့နယ်တွေအပါအဝင်စတဲ့မြို့နယ်တွေမှာပါရောဂါကူးစက်ဖြစ်ပွားနေတာလက်ရှိအချိန်ထိဖြစ်ပြီးဝမ်းပျက်ဝမ်းလျှောရောဂါကြောင့်သေဆုံးတဲ့ လူကြီး၅ယောက်ထက်မနည်းရှိပါတယ်။
လက်ရှိမှာတော့ ဝမ်းပျက်ဝမ်းလျှော ဖြစ်ပွားတဲ့နေအိမ်တွေကိုတော့ ရေထဲကလိုရင်းခတ်ခြင်း၊ဆေးဖြန်းခြင်းတွေကိုမြို့နယ်အလိုက်လုပ်ဆောင်နေပြီး ရောဂါဖြစ်ပွားသူတွေထဲကလူကြီးတွေကိုရန်ကုန်ဆေးရုံကြီးပို့ဆောင်ကာကလေးငယ်တွေကိုရန်ကင်းကလေးဆေးရုံမှာကုသမှုပေးနေတာဖြစ်တယ်လို်သိရပါတယ်။
ဝမ်းပျက်ဝမ်းလျှောရောဂါကြောင့်အသက်၅နှစ်အောက်ကလေးငယ်တွေသေဆုံးရခြင်းရဲ့ အဓိကအကြောင်းရင်းတွေထဲမှာပါကြောင်း ကမ္ဘာ့ကျန်းမာရေးအဖွဲ့အစည်း WHO က ထုတ်ပြန်ထားတာကြောင့် ကလေးတွေမှာ ဝမ်းပျက်ဝမ်းလျှောဖြစ်ရင် မပေါ့ဆသင့်ဘဲ ကုသမှုခံယူဖို့အဓိကလိုအပ်ပါတယ်။
ဝမ်းပျက်ဝမ်းလျှောရောဂါကို သေချာမကုသပါက အသက်သေဆုံးတဲ့အထိဖြစ်ပွားနိုင်သလို နောက်ဆက်တွဲဆိုးကျိုးအနေနဲ့အာဟာရချို့တဲ့ခြင်း၊ခန္ဓာကိုယ်ထဲကဓာတ်ဆားများဆုံးရှုံးခြင်း၊ပျော့ခွေသွားခြင်း၊ရေဓာတ်ဆုံးရှုံးမှုလွန်ကဲပြီးသွေးလန့်ခြင်း၊တက်ခြင်း၊အပူကြီးခြင်း၊သွေးဆိပ်တက်ခြင်းဖြစ်ပွားနိုင်တယ်လို့သိရပါတယ်။
ဒါကြောင့်ကလေးငယ်တွေမှာ ကော်ဖီရောင်အညိုများအန်ခြင်း ၊ သွေးစများအန်ခြင်း၊ အစိမ်းရောင် သို့မဟုတ်စိမ်းဝါရောင်များအန်ခြင်း၊ဗိုက်အလွန်အောင့်ပြီးငိုခြင်း၊မှိန်းခြင်း၊နုံးခွေနေခြင်း၊အရည်လုံးဝတိုက်မရဘဲ ဆက်တိုက်အန်နေခြင်း၊ငယ်ထိပ်ချိုင့်ခြင်း၊နို့ကောင်းကောင်းမစို့ခြင်း၊ဖျားနာခြင်း လက္ခဏာတွေ ဖြစ် လာပါက နီးစပ်ရာဆေးရုံ၊ဆေးခန်းကိုချက်ချင်းအမြန်သွားပြသရမှာဖြစ်တယ်လို့ ဆရာဝန်တွေကသတိပေးထား ပါတယ်။
သတင်းရေးသားပေးပို့သူ = ချစ်ခွန်းချို
တည်းဖြတ်- MyanHealth’s Editorial team
သတင်းရေးသားသူသည် ၂၀၁၂ မှ စတင်ပြီး သတင်းလုပ်ငန်းများကို လုပ်ကိုင်နေသည့် ဂျာနယ်လစ်တစ်ဦးဖြစ်သည်။တိုင်းရင်းသားရေးရာများ၊စိုက်ပျိုးစီးပွားသတင်းများ၊လူမှုဘဝ နှင့် ယဥ်ကျေးမှု ဆိုင်ရာ ဆောင်းပါးများကိုအဓိကထားရေးသားလျက်ရှိသည်။
မျှဝေရင်းကူ
